Eusko Jaurlaritzak eta Microsoftek akordioa sinatu dute nahi duenak aplikazio biak euskaratzeko tresnak doan jaisteko Interneten. Microsoft konpainiak Eusko Jaurlaritzaren Kultura Sailarekin batu ditu indarrak milioi bat inguru euskal hiztunei zuzendutako ekimen-sorta bultzatzeko, euskararen zabalkundea eta erabilera teknologia berrien eremuan "irmo" sustatzeko helburuz. Ahalegin honekin bat egin dute Informazioaren eta Komunikazioaren Teknologien sektorean lider diren Dell, Inves eta HP konpainiek. Gaur goizean aurkeztu dute Donostiako Miramon Parke Teknologikoan "IKT tresna berriak euskaraz, ekoizpena hobetzeko" ekimena. Bertan izan dira Miren Azkarate Kultura sailburua eta Patxi Baztarrika Hizkuntza Politikarako sailburuordea, Eusko Jaurlaritzaren aldetik, eta Rosa Garcia Microsoft Iberica enpresako presidentea. Egun, Estatistikaren Espainiako Institutu Nazionalaren (INE) arabera, Euskal Autonomia Erkidegoko (EAE) etxeen %63,6en ordenagailua dago, eta %50en interneterako sarbidea dute. Kopuru horiek estatu mailan IKTek ezarpen handiena duten autonomia erkidegoetako batean bihurtzen dute EAE. Teknologia ahalik eta pertsona gehienen eskuetara heldu dadin, haien beharrak asetze aldera, eta IKTek euskal hiztunen hizkuntzan "hitz egin" dezaten eskaera hazkorrarekiko konpromisoa erakutsita, Microsoftek inbertsio ahalegin garrantzitsua egin du softwareko azken produktuak euskarara egokitzeko. Hori gauzatu ahal izateko, Eusko Jaurlaritzako Kultura Sailaren eta Hizkuntza Politikarako Sailburuordetzaaren euskarria izan du lagun, hizkuntza eta terminologia gaien inguruan aholkularitza jasota, eta hizkuntza horretan egindako interfazeen lehen bertsioen ebaluazioan elkarlanean arituta. IKTen bitartez euskararen zabalkundea bultzatzeko konpromisoari ekarpen berria eginda, Microsoftek gaur egun merkatuan dituen bi produktu izarren interfazeak euskaraz eskuratu daitezkeela iragarri du: Windows Vista sistema eragilea eta Microsoft Office 2007 suite ofimatikoa. Honako interfazeak doan eta modu erraz eta seguruan deskargatu daitezke Microsoftek horretarako propio eskainitako webgunetik.